تا چې څه ويلي: د بدر د ژوند کيسې

14.00

د بدر د ژوند کیسې

لیکوال: فريدون خوځون

یادونه: دا لیکنه د ۱۳۹۲ کال د ثور په پنځه لسمه نېټه، د قلم نړيوالې ټولنې په هغه غونډه کې، چې د صدیق الله بدر د ادبي خدمتونو د درناوي په خاطر جوړه شوې وه؛ اورول شوې ده.

*********************************************************************

د پاکستان په پخواني لومړي وزیر پورې اړوند خبره ده چې د افغان دېرش کلن ناورین لیکل یو بل نسیم حجازي ته اړتیا لري.

که څه هم چې هر افغان په زړه کې بلا کیسې لري او د افغانستان د تېر ناورین کیسې په بېلابېل ډولونو تر یوه حده لیکل شوي دي، خو اوس هم د ډېرو افغانانو په سینو کې داسې ناویلې خبرې شته چې په اورېدو او لوستو یې د سړي غوني زیږيږي.

(( د ژوند کیسې )) د صدیق الله بدر په قلم او هڅو د هغو ځورېدلو، ربړېدلو او اتلو افغانانو کیسې دي، چې تر اوسه نه چا اورېدلي او نه هم له دې وړاندې لوستل شوې وې، چې اوسني عصر ته د تېرو بدو ورځو میراث دی.

ادامه نوشته

تا چې څه ويلي: د صدیق الله بدر لیکوالي

د صدیق الله بدر لیکوالي

لیکواله: نعیمه غني

یادونه: دا لیکنه د ۱۳۹۲ کال د ثور په پنځه لسمه نېټه، د قلم نړيوالې ټولنې په هغه غونډه کې، چې د صدیق الله بدر د ادبي خدمتونو د درناوي په خاطر جوړه شوې وه؛ اورول شوې ده.

*********************************************************************

که څه هم د ښاغلي صدیق الله بدر له نوم سره زما لومړۍ پیژندګلوي د کلید او مرسل مجلو له لارې شوې. ځکه په هغه وخت کې یوازنۍ د مطالعې منبع چې ما لرله همدا مجلې وې چې زموږ د ولسوالۍ بازار ته به په منظم ډول راتلې او خرڅیدلې. هغه وخت په دې مجلو کې هر لیکوال او یا به هم ووایم د کلید ګروپ هر غړی ما او زما په شان نورو کلیوالو نجونو ته له یوه اتل نه کم نه وو، ځکه چې یوازې دوی او دا ډول څو ګوته په شمار لیکوال او ژورنالیستان وو، چې دا فکر ورسره و چې یوازې د لویو ښارونه خلک نه دي چې مجلو، اخبارونو او د نورو لیکل شویو اثارو مطالعې ته ضرورت لري، بلکې په لیرې پرتو سیمو او کلیو کې هم داسې یو نیم کس پیدا کیږي چې د مطالعې لپاره تږی دی او دا یې خپله دنده ګڼله چې د هغوی غم وخوري، ورته کار وکړي او دا تنده یې خړوب کړي. خو زما دا لیکنه د ښاغلي صدیق الله بدر په هغو فعالیتونو چې په کلید ګروپ کې یې کړي، نه ده. بلکې غواړم په هغو ارزښتناکو لیکنو کوم چې نوموړي په خپل شخصي ویبلاګ(د لونګو دریڅې) کې د بیلابیلو چاپ شویو کتابونو د پیژندګلوۍ او خبرتیا په هکله کړې دي څو ټکي درسره شریک کړم.

ادامه نوشته

د لونګو دريڅې: عابد؛ ریالستیک کیسه لیکوال

ادبي بحثونه/ صدیق الله بدر

عابد؛ ریالستیک کیسه لیکوال

بيا هم د پښتو معاصرې كيسه ليكنې پر بهير سره خبرې كوو.

كيسه د واقعيت او خيال يو رنګين او منطقي تړاو دى، كومه كيسه چې پر واقعيت بنا وي او د خيال په مټ انځور شوې وي، له لويه سره يوه كاميابه كيسه ګڼل كېږي، خو كومې كيسې، چې له دغې ځانګړنې بې برخې وي، تر ډېره بريده پر لوستونكو او په تېره پر باذوقه لوستونكو اغېز نه پرېباسي. د دې خبرې يادونه ځكه ضروري ده چې موږ د پښتو د معاصرې كيسه ليكنې په بهير كې ځينې داسې كيسې لرو، چې يا خو بشپړ واقعيت وي، چې د خيال هيڅ څرك په كې نه ترسترګو كېږي او د يوې پېښې مخامخ بيان وي يا خو كاملا يوه خيالي كيسه وي چې واقعي ګڼل يې ګران وي.

ادامه نوشته

غوره وینا: شل غوره ویناوې

غوره ویناوې

ژباړه: صدیق الله بدر

شل غوره ویناوې

۸۱- بې مينې خلک، هغه ړانده دي چې هيڅکله هم منزل ته نه رسېږي. (ژان ژاک روسو)

۸۲- پاکه پوهه په ناپاکو زړونو کې ځای نه نيسي. (سقراط)

 ۸۳- ټول وخت ته اړتیا لري. انسان نباید مخکې تر دې چې وپوهېږي څه وايي، نتیجه ګېري وکړي. (ژان پل سارټر)

۸۴- که چا پر خپل زړه غلبه حاصله نه کړه پر هيڅ څيز هم نه غالبېږي. (زردشت)

۸۵- د وجدان عذاب، په سوزنده سارا کې تر مرګ ډېر بد دی. (ویکتور هوګو)

۸۶- ډېر ستر ازمون اخستونکی الله دی او ډېر کوچنی ازمون ورکوونکی د خدای بنده دی. (ویکتور هوګو)

۸۷- له عکس سره د نقاشۍ توپير د هغې ارامتیا احساس دی چې نقاشي يې انسان ته ورکوي. (پيکاسو)

۸۸- د دې په ځای چې له خپلو دښمنانو سره کينه وکړو، خدای ته شکر وکړو چې زموږ ژوند يې د هغوی په څېر نه دی کړی. (ديل کارنګي)

۸۹- ژوند يعنی هره ورځ او هر ساعت ژوند کول. (دیل کارنګي) 

۹۰- موسکا کوم لګښت نه لري خو ګټه يې ډېره زیاته ده. (دیل کارنګي) 

۹۱- د ژوند غوره دستور دا دی چې پر خپل نفس باور ولرو. (میکلانژ)

۹۲- څومره چې انسان حساس وي هغومره رنځ وړي. (لېوناردو داوينچي)

۹۳- کله چې بډایان جنګ پيلوي، دا فقیران دي چې په کې مري. (ژان پل سارتر)

۹۴- زه تل کولای شم ازادانه انتخاب وکړم، خو باید پوه شم که انتخاب ونه کړم، بیا هم یو انتخاب مې کړی. (ژان پل سارتر)

۹۵- تر زړه هيڅ څيز هم ډېر ساده نه ماتېږي. (ژان پل سارتر)

۹۶- که څوک یوازې هیله کول د عاید ترلاسه کولو وسیله وګرځوي ښايي له لوږې ومري. (بنجامين فرانکلین)

۹۷- حقه خبره، که يې ونه منې هم پر تا به اغېز ښندي. (بنجامين فرانکلین)

۹۸- هغه څه چې په قهر او غضب پيلېږي، له شرم او پښيمانۍ سره ختمېږي. (بنجامين فرانکلین)  

۹۹- څوک چې شته نه لري، ځان لري. (بنجامين فرانکلین)

۱۰۰- که د يو بل د فکر لوستلو جادو مو لرلای؛ لومړنی څيز چې، به په دنیا کې له منځه تله، مینه وه. (براتراند راسل) 

ادامه نوشته